మీ భవిష్యత్తుకు మీరే మార్గనిర్దేశకులు ఏకాగ్రతతో చదివి సిలబస్ ను ఆకళింపు చేసుకోవాలి ఆత్మన్యూనతా భావాన్ని దరి చేరనివ్వద్దు ప్రస్తుత ఉద్యోగాల భర్తీ ప్రక్రియ ఎంతో కీలకమైనది ఇంటర్వ్యూ విధానం రద్దుతో అనవసర అపోహలకు తావులేదు ప్రభుత్వ కొలువు సాధించి బంగారు తెలంగాణ నిర్మాణంలో పాలుపంచుకోవాలి ప్రీ కోచింగ్ అభ్యర్థులకు రాష్ట్ర ఎన్నికల కమిషనర్ పార్థసారథి పిలుపు

మీ భవిష్యత్తు మీ చేతుల్లోనే ఉందని, దానిని ఎలా నిర్దేశించుకోవాలన్నది మీ పైనే ఆధారపడి ఉంటుందని రాష్ట్ర ఎన్నికల కమిషనర్ సి.పార్థసారథి స్పష్టం చేశారు. ఏకాగ్రతతో చదువుతూ, పక్కా ప్రణాళికతో సన్నద్దమైతే కోరుకున్న ప్రభుత్వ కొలువును దక్కించుకోవడం కష్టమైన పనేమీ కాదని అన్నారు. నిజామాబాద్ జిల్లా కేంద్రంలోని రాజీవగాంధీ ఆడిటోరియంలో పోలీస్ ఉద్యోగాలు, పోటీ పరీక్షలకు సిద్దమవుతున్న యువతీ, యువకులకు ప్రీ కోచింగ్ అందిస్తున్న నేపథ్యంలో రాష్ట్ర ఎన్నికల కమిషనర్ పార్థసారథి మంగళవారం జిల్లా కలెక్టర్ సి.నారాయణరెడ్డి, పోలీస్ కమిషనర్ కెవి.నాగరాజుతో కలిసి ఉద్యోగార్థులకు మార్గదర్శనం చేశారు. వేదిక పై నుండి దిగి అభ్యర్థుల మధ్యకు వచ్చి తనదైన శైలిలో కీలక సూచనలు చేస్తూ వారిలో స్ఫూర్తిని పెంపొందింపజేశారు. ఉద్యోగ సాధనకై పాటించాల్సిన పద్ధతులు, సన్నద్ధత తీరు గురించి అన్ని అంశాలను మేళవిస్తూ, ఎంతో అర్ధవంతంగా ఆకట్టుకునే రీతిలో విడమర్చి చెప్పడం అభ్యర్థుల్లో ఆత్మస్థైర్యాన్ని ఇనుమడింపజేసింది. ప్రభుత్వ పాఠశాల, కళాశాలలో తెలుగు మాధ్యమంలోనే తాను చదువుకుని కోరుకున్న సివిల్ సర్వీస్ ఉద్యోగాన్ని సాధించానంటూ తన స్వీయానుభవాన్ని అభ్యర్థుల ముందు ఉంచుతూ వారిలో ఆత్మవిశ్వసం నింపే ప్రయత్నం చేశారు.
నిరాశ, నిస్పృహలను దరిచేరనివ్వకుండా, తాము ఎలాగైనా సాధిస్తానని గట్టి సంకల్పంతో కష్టపడితే ఆశించిన లక్ష్యం దానంతట అదే వరిస్తుందని కమిషనర్ పార్థసారథి సూచించారు. మొహమాటం, బద్ధకం, వాయిదా వేయడం వంటి దురలవాట్లకు దూరంగా ఉంటూ, మానసిక ఒత్తిడిని జయిస్తూ ముందుకు సాగాలని హితవు పలికారు. ప్రస్తుతం ప్రభుత్వం పెద్ద ఎత్తున చేపడుతున్న ఉద్యోగాల భర్తీ ప్రక్రియ ఎంతో కీలకమైందని పేర్కొన్నారు. పోరాడి సాధించుకున్న ప్రత్యేక రాష్ట్రంలో యువత కోరుకున్న కొలువులు దక్కించుకుని బంగారు తెలంగాణ నిర్మాణంలో భాగస్వాములు కావాలని రాష్ట్ర ఎన్నికల కమిషనర్ పార్థసారథి పిలుపునిచ్చారు. ప్రభుత్వం ఇంటర్వ్యూ విధానాన్ని రద్దు చేయడంతో అనవసర అపోహలకు ఆస్కారం లేకుండా పోయిందన్నారు. ఇదివరకటితో పోలిస్తే అభ్యర్థులకు అనేక సదుపాయాలు అందుబాటులో ఉన్నాయని, వాటిని సద్వినియోగం చేసుకుని జిల్లాకు అత్యధిక కొలువులు దక్కేలా కృషి చేయాలని సూచించారు. ప్రీ కోచింగ్ తో ఇప్పటికే యాభై శాతం విజయం సాధించగలిగారని, ఇంకాస్త గట్టిగా కష్టపడితే జీవితాన్ని ఆనందమయంచేసుకోవచ్చని సూచించారు. ప్రభుత్వ అధికారి హోదాను అనుభవిస్తూ ప్రజలకు సేవ చేస్తూ ఆత్మ సంతృప్తిని పొందే అవకాశం కేవలం ప్రభుత్వ ఉద్యోగం ద్వారానే లభిస్తుందని అన్నారు. పోటీ పరీక్షలకు సంబంధించి పరీక్షా విధానంలో, సిలబస్ లో పెద్దగా తేడా ఉండదని విషయం పరిజ్ఞానం, అవగాహన ముఖ్యమని సూచించారు. ఎన్ని గంటల పాటు చదివాము అని కాకుండా, ఎంత ఏకాగ్రతతో చదివాము, చదివిన అంశాలను పరీక్షలో ఎలా రాశాము అన్నదే అభ్యర్థుల విజయావకాశాలను నిర్ణయిస్తుందని పేర్కొన్నారు. ప్రతి ఒక్కరిలో శక్తి సామర్త్యాలు నెలకొని ఉంటాయని, తమపై తాము గట్టి నమ్మకంతో కష్టపడే వారే విజేతలు అవుతారని అన్నారు. నేర్చుకుంటున్న అంశాలను ఎప్పటికప్పుడు పునఃశ్చరణ చేసుకుంటూ, ఏవైనా లోటుపాట్లు ఉంటే సరిచేసుకోవాలని సూచించారు. పోటీ పరీక్షల సన్నద్ధత వన్ డే మ్యాచ్ కాదని, దీనిని టెస్ట్ మ్యాచ్ గా భావిస్తూ, నిలకడ, ఏకాగ్రతతో లక్ష్యాన్ని ఛేదించాలని కమిషనర్ పార్థసారథి పేర్కొన్నారు. చిన్న చిన్న అవరోధాలను, అపజయాలను చూసి కుంగిపోకూడదని, వాటిని విజయానికి మెట్లుగా వాడుకోవాలని హితవు పలికారు. మన చేతుల్లో లేని విషయాల గురించి ఆలోచిస్తూ సమయం వృధా చేయడం కంటే, మనం చేయాల్సిన కర్తవ్యాన్ని పూర్తి స్థాయిలో నిర్వర్తించడం పైనే దృష్టిని కేంద్రీకరించాలని హితబోధ చేశారు. కాగా, జిల్లాలో ప్రీ కోచింగ్ కోసం చేసిన ఏర్పాట్లు, అభ్యర్థులకు అందిస్తున్న శిక్షణ, వసతి సౌకర్యాలు ఇత్యాది విషయాల గురించి కలెక్టర్ సి.నారాయణరెడ్డి, పోలీస్ కమిషనర్ నాగరాజు రాష్ట్ర ఎన్నికల కమిషనర్ దృష్టికి తెచ్చారు.
ఈ కార్యక్రమంలో అదనపు డీసీపీలు అరవింద్ బాబు, ఉషా విశ్వనాథ్, జిల్లా ఎస్సీ, ఎస్టీ సంక్షేమ శాఖల అధికారులు శశికళ, నాగోరావ్, బీసీ స్టడీ సర్కిల్ డైరెక్టర్ వెంకన్న తదితరులు పాల్గొన్నారు. అంతకు ముందు నిజామాబాద్ కు చేరుకున్న రాష్ట్ర ఎన్నికల కమిషనర్ పార్ధసారథి ఆర్ అండ్ బీ అతిథి గృహం వద్ద పోలీసుల గౌరవ వందనం స్వీకరించారు. కలెక్టర్ నారాయణరెడ్డి, పోలీస్ కమిషనర్ నాగరాజు, అదనపు కలెక్టర్ చంద్రశేఖర్, జెడ్పి సీఈఓ గోవింద్, డీపీవో జయసుధ తదితరులు పూల మొక్కలు అందించి స్వాగతం పలికారు.
————————–

Share This Post