వరంగల్ జిల్లా కేంద్రానికి సమీపంలోని ములుగు క్రాస్ రోడ్ వద్ద ‘‘ప్రతిమ రిలీఫ్ ఇనిస్టిట్యూట్ ఆఫ్ మెడికల్ సైన్సెస్’’ పేరిట నెలకొల్పిన మెడికల్ కాలేజీని, హాస్పిటల్ ను ముఖ్యమంత్రి శ్రీ కె.చంద్రశేఖర్ రావు గారు శనివారం ఉదయం ప్రారంభించారు. పూజా కార్యక్రమాల్లో పాల్గొన్న అనంతరం ముఖ్యమంత్రి హాస్పిటల్ ను కలియదిరిగి పరిశీలించారు. ఈ కార్యక్రమంలో మంత్రులు తన్నీరు హరీశ్ రావు, ఎర్రబెల్లి దయాకర్ రావు, సత్యవతి రాథోడ్, గంగుల కమలాకర్, రాష్ట్ర ప్రణాళికా సంఘం ఉపాధ్యక్షుడు బోయినిపల్లి వినోద్ కుమార్, ఎంపీలు జోగినపల్లి సంతోష్ కుమార్, దీవకొండ దామోదర్ రావు, వద్దిరాజు రవిచంద్ర, పసునూరి దయాకర్, ప్రతిమ గ్రూపు సంస్థల చైర్మన్ బోయినిపల్లి శ్రీనివాస్ రావు, ఎమ్మెల్సీలు కడియం శ్రీహరి, మధుసూదనాచారి, బస్వరాజు సారయ్య, డాక్టర్ బండా ప్రకాశ్, పోచంపల్లి శ్రీనివాస్ రెడ్డి, నవీన్ కుమార్, పాడి కౌశిక్ రెడ్డి, ప్రభుత్వ చీఫ్ విప్ దాస్యం వినయభాస్కర్, ఎమ్మెల్యేలు చల్లా ధర్మారెడ్డి, ఆరూరి రమేశ్, వొడితెల సతీష్ కుమార్, నన్నపునేని నరేందర్, పెద్ది సుదర్శన్ రెడ్డి, శంకర్ నాయక్, డాక్టర్ టి.రాజయ్య, ముత్తిరెడ్డి యాదగిరి రెడ్డి, గ్రేటర్ వరంగల్ మేయర్ గుండు సుధారాణి, కార్పొరేషన్ల చైర్మన్లు మెట్టు శ్రీనివాస్, కె.వాసుదేవరెడ్డి, బొల్లం సంపత్ కుమార్, వై.సతీష్ రెడ్డి, బండ శ్రీనివాస్, మాజీ ఎంపీ సీతారాం నాయక్, మాజీ ఎమ్మెల్సీ బాలసాని లక్ష్మీనారాయణ, జిల్లా కలెక్టర్ గోపి, సీపీ తరుణ్ జోషి, వరంగల్ మున్సిపల్ కార్పొరేషన్ కమిషనర్ ప్రావీణ్య, ప్రతిమ హాస్పిటల్స్ డైరెక్టర్లు డాక్టర్ ప్రతీక్, డాక్టర్ హరిణీ, డాక్టర్ రమేష్, డాక్టర్ అవినాష్, డాక్టర్ రాహుల్, పలువురు ప్రజాప్రతినిధులు, నాయకులు పాల్గొన్నారు. ప్రతిమ మెడికల్ కాలేజీ, హాస్పిటల్ ప్రారంభించిన సందర్భంగా సభలో సీఎం కేసీఆర్ గారి ప్రసంగం • వైద్యవిద్యరంగంలో పనిచేస్తున్న ప్రతిమ యాజమాన్యం.. తాము పుట్టిన గడ్డ వరంగల్లో మెడికల్ కాలేజీ,హాస్పిటల్ ప్రారంభించడం అభినందనీయం • ‘‘ కేసీఆర్ గారు తెలంగాణ ఉద్యమం ప్రారంభించినప్పుడు, ఇపుడున్న పిల్లలు పుట్టి ఉండవచ్చు. వాళ్లంతా ఇపుడు మెడికల్ విద్యార్థులు అయ్యా రు. వారు పుట్టి పెరుగుతున్నపుడే ఉద్యమం నడిచింది. ఏం జరుగుతుందో వారికి అన్ని విషయాలు తెలుసు.’’ అని ఇపుడే ప్రతిమా శ్రీనివాస రావు గారు అన్నారు. • నేడు సమాచార విప్లవం విశ్వవ్యాప్తంగా విస్తరిస్తున్నందున సమాచారం ఏ ఒక్కరి దగ్గరో లేదు. నాలెడ్జి బ్యాంకు లేదు. ఎవరైనా పరిశోధిస్తే ఆ విజ్ఞానాన్నే అందరూ సముపార్జించే సందర్భంలో మనం ఉన్నాం. • తెలంగాణ ప్రజల అండదండలతో కొనసాగిన ఉద్యమం అద్భుతంగా రాష్ట్రాన్ని సాధించింది. అనేకరంగాల్లో తెలంగాణ భారత దేశంలోనే నంబర్ వన్ గా ఉన్నది. • దీంట్లో అనుమానం ఏమీ లేదు. రాజకీయాలకోసం కేంద్రమంత్రులు ఇక్కడ తెలంగాణకు వచ్చి కేసీఆర్ ను తిట్టిపోతరు. అక్కడ ఢిల్లీలో అవార్డులు ఇస్తరు. అవి రాజకీయాలు, వాటి విషయం వేరు. • కానీ, ఉద్యమ సందర్భంలో నేను ప్రజలకు ఏదైతే పదే పదే చెప్పానో, అది వందకు వందశాతం ఈరోజు సాకారం అవుతున్నది. • చాలా అద్భుతంగా గొప్పగా, దేశంలోనే ధనికరాష్ట్రంగా తెలంగాణ ఉంటదని నేను చెప్పిన. అదే జరుగుతున్నది. • అద్భుతమైన విజయం ఏందంటే ఫైనాన్షియల్ క్యాపిటల్ ఆఫ్ ఇండియా ముంబై రాజధానిగా ఉన్న మహారాష్ట్రకంటే మన తెలంగాణ పర్ క్యాపిటా ఇన్ కమ్ ఎక్కువ. • జీఎస్టీపీ గ్రోత్ ఎక్కువ, పర్ క్యాపిటా పవర్ యుటిలైజేషన్ ఎక్కువ. • పరిశుభ్రతలో, పచ్చదనంలో, హరితహారం వనీకరణలో అనేక రంగాల్లో • ఏ ఆస్పెక్ట్ తీసుకున్నా, ఆల్ మోస్ట్ వి ఆర్ ప్రొవైడింగ్ లీడర్ షిప్ టు ద నేషన్ టుడే. టు అనౌన్స్ ది టైమ్.. రియల్లీ ప్రౌడ్. • తెలంగాణ సమాజానికి అద్భుతమైన చైతన్యం ఉన్నది. అర్ధం చేసుకొని సహకరించే స్థానిక ప్రజా ప్రతినిధులు, ప్రజల ఆకాంక్షల మేరకు పనిచేస్తున్న మన గౌరవ మంత్రులు, ఎంపీలు, ఎమ్మెల్యేలు, వీరందరితో చక్కగా సమన్వయం చేసుకొని ముందుకుపోతున్న అధికార గణం ఈ ఫలితాలన్నీ సాధించగలిగింది. • ఆరోగ్యరంగంలో కూడా మనం అద్భుతాలు సాధించినం. మరింత సాధించవలసి ఉన్నది. • గతంలో తెలంగాణ ప్రాంతం నిర్లక్ష్యానికి గురైంది. ఇక్కడ ఎంబీబీఎస్ సీట్ల కోసం ప్రభుత్వ రంగంలో కేవలం 5 మెడికల్ కాలేజీలు మాత్రమే ఉండేవి. ఈరోజు మరో 12 కాలేజీలను మనం కొత్తగా తెచ్చుకున్నం. మొత్తం 17 మెడికల్ కాలేజీలయ్యాయి. • అంతేకాదు మీ అందరికీ నేను శుభవార్త తెలియజేస్తున్నాను. • కేంద్ర ప్రభుత్వం తెలంగాణపై వివక్ష చూపించి, కేంద్రరంగంలో ఒక్క మెడికల్ కాలేజీ కూడా మంజూరు చేయలేకపోయినా, మన స్వశక్తి ఉంది కాబట్టి తెలంగాణ ప్రభుత్వం 33 జిల్లాల్లో మంజూరు చేసింది. ప్రారంభించుకున్నం. రాబోయే కొద్దిరోజుల్లో ఆ మిషన్ కంప్లీట్ అవుతుంది. • యువకుడు హరీష్ రావు హెల్త్ మినిస్టర్ గా ఉన్నడు కాబట్టి, తప్పకుండా మనం సాకారం చేసుకోబోతున్నం. • 2014లో తెలంగాణ రాష్ట్రం ఏర్పాటు కాకముందు మనకు కేవలం 2800 మెడికల్ సీట్లు మాత్రమే ఉండేవి. ఈరోజు 6500 మందికి మనం మెడికల్ సీట్లు ఇస్తున్నం. • అన్ని జిల్లాల్లో మెడికల్ కాలేజీలు పూర్తయితే 10 వేల మెడికల్ సీట్లు ఉంటయి. • ఇక్కడి పిల్లలు, రష్యాకు, చైనాకు, ఉక్రెయిన్ కు పోయే పరిస్థితి రాదు. ఇక్కడే మన విద్యార్థులు ఏ ఇబ్బంది లేకుండా చదువుకోవచ్చు. • పీజీ సీట్లలో కూడా గతంలో 1150 సీట్లు మాత్రమే ఉండేవి. ఈరోజు 2500 పీజీ సీట్లు మన రాష్ట్రంలో ఉన్నవి. ఆరోగ్యరంగంలో మనం చక్కగ పురోగమిస్తున్నం. • మనం తెలంగాణ తెచ్చుకున్నం. పురోగమిస్తున్నం. దేశానికే ఒక ఉదాహరణగా మనం ఉన్నం. • ఇక్కడ అందరూ చదువుకున్న వాళ్లున్నరు. నేను మీ అందరినీ కోరేది ఒక్కటే. • ఏ దేశమైనా, ఏ సమాజమైనా ఎప్పుడైనా ఎప్పటికప్పుడు చుట్టూ సంభవించే పరిణామాలను గమనిస్తూ అప్ డేటెడ్ గా ఉంటదో ఆ సమాజం చక్కగా ఉంటది. చల్లగా ఉంటది. ముందుకు పురోగమిస్తూ ఉంటది. • ఏ సమాజమైతే కొంచెం నిద్రాణమై, కొంచెం మూగబోయి, కొంచెం ఏమరుపాటుగా ఉంటే.. చాలా పెద్ద దెబ్బతింటది. • మన తెలంగాణలో మనం పడ్డ బాధలే దీనికి మంచి ఉదాహరణ. • ఒకనాడు తెలంగాణ నాయకత్వం కొద్దిపాటి ఏమరుపాటుదో ఉంటే, ఉన్న రాష్ట్రాన్ని పోగొట్టుకుంటే, తిరిగి మళ్లీ మన రాష్ట్రాన్ని మనం సాధించుకోవడానికి ఎంతమంది చనిపోయిండ్రు, ఎన్ని ఉద్యమాలు చేసినం, ఎన్ని లక్షల మంది జైళ్ల పాలైనం, ఎన్ని దశాబ్దాల కాలం పట్టింది. తెలంగాణ ఎంత నష్టపోయిందో మనకు తెలుసు. • ఏడేండ్ల కింద తెలంగాణ ఎట్లున్నదో, ఈరోజు తెలంగాణ ఎట్లున్నదో మీకు తెలుసు. • ఏడేండ్ల కింద మనకు మంచినీళ్లు ఎట్లొచ్చినయో ఈరోజు ఎట్లొస్తున్నయో తెల్సు • ఏడేండ్ల కింద మన కరెంటు ఏట్లొచ్చేదో, ఇయ్యాల ఎట్లొస్తున్నదో చూడాలె. • లేక కాదు, వనరులు వసతులు, అవకాశాలు అన్నీ ఉండి కూడా, ఆరోజు మనం వంచించబడ్డాం. మోసపోయినం. దగాపడ్డం. • మళ్లీ మన అస్తిత్వాన్ని నిలబెట్టుకోవాలంటే ఇన్ని దశాబ్దాలు పోరాటం చేస్తే, చివరికి 2001లో మళ్లీ నేను తెలంగాణ ఉద్యమం మొదలుపెట్టి గర్జిస్తే, మీరందరూ ఎక్కడివాళ్లక్కడ విజృంభిస్తే రాష్ట్రాన్ని తెచ్చుకున్నం. ఈ రోజు దేశానికే ముందు నిలబడి మార్గదర్శకంగా నిలిచే స్థాయికి మనం ఎదిగినం. • భారతదేశం ప్రపంచానికే అన్నపూర్ణ. మన దేశంలో ఉన్న సంపదలు ప్రపంచంలోనే మరే దేశంలో లేవు. • మనకంటే మూడు రెట్లు ఉండే అమెరికాలో కూడా వ్యవసాయానికి అనుకూలమైన భూమి కేవలం 29శాతమే ఉంది. • మనకంటే రెండింతలుండే చైనాలో కూడా కేవలం 16 శాతమే వ్యవసాయానికి అనుకూలమైన భూమి ఉన్నది. • కానీ, మన భారతదేశం విస్తరించి ఉన్న భూభాగం 83 కోట్ల ఎకరాల్లో.. అందులో 50శాతం అంటే 41 కోట్ల ఎకరాల వ్యవసాయానికి అనుకూలంగా ఉన్నది. • అద్భుతంగా వ్యవసాయానికి అనుకూలమైన వాతావరణ (ఎక్సలెంట్ ఆగ్రో క్లైమేటిక్ కండిషన్స్) పరిస్థితులున్నవి. • అంతేకాదు టిపికల్ మిక్స్ ఆఫ్ లాండ్స్.. నల్లనేలలు, ఎర్ర నేలలు, ఇసుక నేలలు, తేలికపాటి నేలలున్నవి. • వీటితోపాటు నదులలో ప్రవహించే 70 వేల టీఎంసీల నీళ్లున్నవి. • ఇన్ని వనరులు, వసతులున్న ఈ దేశంలో మనం మెక్ డోనాల్డ్, బర్గర్లు తింటున్నం. • నేడు ప్రపంచానికే ఆహారాన్నిందించే భారతదేశం వంచించబడుతున్నది. • ఫలితంగా దేశ రాజధాని ఢిల్లీలో వేల మంది రైతులు 13 నెలలకు పైగా ధర్నాలు చేసే పరిస్థితి. • ఏం లేక మనకీ దుస్థితి. కరెంటు లేకనా, నీళ్లు లేకనా, వనరులు లేకనా, 1 కోటి 40 లక్షల జనాభా లేకనా, పనిచేసే యువశక్తి లేకనా? • ఈ విషయాలు అందరికంటే మనం, ఈ దేశ భాగస్వాములం, పౌరులం, ఈదేశం నాది అని భావించే వాళ్లం ఎప్పటికప్పుడు తెలుసుకోవాలె. అప్ డేట్ కావాలె. • చుట్టూ ఏం జరుగుతుందో పరికించి చూడాలె. దాన్ని సంస్కరించడానికి, మంచి చేయడానికి మనవంతు కృషి చేయాలె. • ఎందరో మహనీయులు త్యాగ ఫలాలు ఇవి. లైఫ్ సేవింగ్ డ్రగ్ పెన్సిలిన్ కోసం తనపైనే ప్రయోగాలు చేసుకొని, తన జీవితాలను కూడా త్యాగం చేసిన గొప్పవాళ్లున్నరు. • ఇలా వీరందరూ ట్రాన్స్ ఫాం చేసిన కల్చర్ తీసుకొని, నేటి నవీన, నాగరిక సమాజం ముందుకు పురోగమిస్తున్నది. • మన పెద్దల విజ్ఞానం మనకు లభించినందునే మనం ఇలా ఉండగలుగుతున్నం. • రాబోయే తరాలకు మంచిని పెంచి, మంచిని పంచి, అభ్యుదయ భావాలను అందించేలా మన కర్తవ్యం ఉండాలి. • ఈరోజు దేశంలో ఏం జరుగుతుందో మీరంతా గమనిస్తున్నరు. • మన దేశం చాలా సహనశీలత ఉన్న గొప్పదేశం. అవసరమైన సందర్భాల్లో త్యాగాలకు సిద్ధపడే దేశం. పోరాటంతో ముందుకుపోయే దేశం. • ఆదరంతో అందరినీ కలుపుకొని పోయే పూల బొకేలాంటిది ఈ భారతదేశం. • కొందరు దుర్మార్గులు నీచ ప్రయోజనాల కోసం దేశంలో విష బీజాలు నాటే ప్రయత్నం చేస్తున్నరు. అది ఏరకంగానూ సమర్థనీయం కాదు. సమాజానికి మంచిది కాదు. • భవిష్యత్ మీది. ఈ భారత దేశం మీది. విద్యార్థులుగా, యువకులుగా, ఈ దేశాన్ని గొప్పగా తీర్చిదిద్దుకునే కర్తవ్యం కూడా మీపైనే ఉంటది. • మీరు అభ్యసించే మెడికల్ విద్యతోపాటు, సామాజిక విద్యను, పరిణామక్రమాన్ని కూడా ఎప్పటికప్పుడు గమనించాలె. • తెలంగాణలో ప్రతి ఒక్కరికీ హెల్త్ ప్రొఫైల్ తయారు చేయాలని సంకల్పించినం. • ఇందులో సామాజిక కోణంలో మేము కూడా భాగస్వాములమవుతం అని చెప్పిన ప్రతిమ శ్రీనివాసరావుకు ధన్యవాదాలు. • ప్రయోగాత్మకంగా సిరిసిల్ల, ములుగులో 100శాతం హెల్త్ ప్రొఫైల్ తయారుచేశాం • ఇక్కడ ప్రతివ్యక్తి బ్లడ్ గ్రూపు, ఆరోగ్య మంచిచెడ్డలన్నీ రికార్డు చేసి, కంప్యూటరైజ్ చేయడం జరిగింది. • ఆ వ్యక్తికి ఏ రకమైన జబ్బు వచ్చినా, ఏదైనా ప్రమాదం జరిగినా ఆపత్కాలంలో ఒక నిమిషంలోనే ఆ వ్యక్తి ఆరోగ్య పరిస్థితి పూర్తిగా తెలుసుకునే ఆస్కారం ఉంటది. • రాష్ట్రంలోని 119 నియోజకవర్గాల్లో ఈ హెల్త్ ప్రొఫైల్ ప్రాజెక్టు పూర్తయితే.. ఏ వ్యక్తికి ఏరకమైన ఆరోగ్య సమస్య వచ్చిన నిమిషంలోనే వారి ఆరోగ్యస్థితి తెల్సుకోవచ్చు. • దీంతో ప్రజలకు అవసరమైన వైద్యసేవలను డాక్టర్లు క్షణాల్లో అందిస్తారు. ప్రాణాలను కాపాడుతారు. • ములుగు అటవీ ప్రాంతంలో డయాలసిస్ సేవలు కూడా అందుబాటులోకి తెస్తున్నం • వరంగల్ తోపాటు, పరిసర కరీంనగర్, ఖమ్మం జిల్లాల ప్రజల కోసం హైదరాబాద్ ను మించిన 2వేల పడకలతో 24 అంతస్తుల్లో సూపర్ స్పెషాలిటీ హాస్పిటల్ నిర్మాణమవుతున్నది. • వరంగల్ వాళ్లు హైదరాబాద్ కు వెళ్లడం కాదు.. హైదరాబాద్ వాళ్లే వరంగల్ కు వచ్చేలాగా ఈ సూపర్ స్పెషాలిటీ హాస్పిటల్ ఉంటది. • ఆర్ అండ్ బీ, ఆరోగ్య మంత్రులు దీన్ని త్వరగా పూర్తి చేయించాలె. • వరంగల్లోనే తెలంగాణ రాష్ట్ర హెల్త్ యూనివర్సిటీని కూడా పెట్టుకున్నం. • మన పురోగమనం ముందుకు సాగాలంటే, సమాజం చైతన్యవంతంగా ఉండాలె. • మేధావులు ముందుండి చైతన్యం చేస్తేనే ఆ సమాజం ముందుకు పోతది. • నవ సమాజ నిర్మాణానికి, నవ భారత నిర్మాణానికి కూడా మీరంతా అడుగులు ముందుకు వేయాలని కోరుతున్నాను. • మీ అందరికీ సద్దుల బతుకమ్మ, దసరా పండుగ విజయదశమి శుభాకాంక్షలు.