తెలంగాణ రాష్ట్రం ఆవిర్భవించి 10వ సంవత్సరంలోకి అడుగుపెడుతున్న సందర్భంగా నిర్వహిస్తున్న తెలంగాణ రాష్ట్ర అవతరణ దశాబ్ది ఉత్సవాలను జిల్లాలో ఘనంగా నిర్వహించాలని గిరిజన సంక్షేమ శాఖ ప్రత్యేక కార్యదర్శి శ్రీదర్ సూచించారు. బుధవారం జిల్లా కేంద్రంలోని కలెక్టరేట్ కార్యాలయంలో జిల్లా కలెక్టర్ బోర్కడే హేమంత్ సహదేవరావు, అదనపు కలెక్టర్లు చాహత్ బాజ్పేయి, రాజేశంలతో కలిసి దశాబ్ది ఉత్సవాలపై జిల్లా మండల స్థాయి అధికారులతో సమీక్ష సమావేశం నిర్వహించారు. ఈ సందర్భంగా ఆయన మాట్లాడుతూ జూన్ 2వ తేదీన నిర్వహించే రాష్ట్ర అవతరణ దినోత్సవంతో పాటు 22వ తేదీ వరకు నిర్వహించనున్న దశాబ్ది ఉత్సవాలను జిల్లాలో విజయవంతం చేసే దిశగా అధికారులు సమన్వయంతో కృషి చేయాలని తెలిపారు. 21 రోజులపాటు కొనసాగే దశాబ్ది ఉత్సవాలను ప్రభుత్వ ఆదేశాలు, కార్యచరణ ప్రకారం నిర్వహించాలని తెలిపారు. దశాబ్ది ఉత్సవాలు జూన్ 2న తెలంగాణ రాష్ట్ర అవతరణ దినోత్సవం పురస్కరించుకొని అమరవీరులకు నివాళులు అర్పించి, జాతీయ పతాకాన్ని ఆవిష్కరించిన అనంతరం జిల్లా అభివృద్ధిపై ముఖ్య అతిధిచే ఉపన్యాస కార్యక్రమం నిర్వహించడం జరుగుతుందని, ప్రభుత్వ శాఖల స్టాళ్లు ఏర్పాటు, సాంస్కృతిక కార్యక్రమాల నిర్వహణ కొరకు చర్యలు తీసుకుంటామని, ప్రతి కార్యాలయం వద్ద ఫ్లెక్సీలు ఏర్పాటు చేయడం జరుగుతుందని తెలిపారు. 21 రోజుల పాటు ప్రభుత్వం రూపొందించిన కార్యాచరణ ప్రకారం ప్రభుత్వ శాఖలతో కార్యక్రమాలు నిర్వహించి ప్రజా ప్రతినిధులను సమన్వయం చేసుకొని దశాబ్ది ఉత్సవాలు విజయవంతంగా నిర్వహించేందుకు చర్యలు తీసుకుంటామని తెలిపారు. గడిచిన 9 సంవత్సరాలలో జరిగిన అభివృద్ధిపై ప్రతి గ్రామంలో ప్రచారం చేసే విధంగా చర్యలు తీసుకుంటామని, ప్రజలందరికీ ప్రభుత్వ సంక్షేమ పథకాలపై వివరించడం జరుగుతుందని, షెడ్యూల్డ్ కులాలు, షెడ్యూల్డ్ తెగలు, వెనకబడిన తరగతులు, మైనారిటీ ల సంక్షేమం, దళిత బంధు పథకాలపై విస్తృత ప్రచారం చేసేందుకు చర్యలు తీసుకుంటున్నామని తెలిపారు. జిల్లా కేంద్రానికి వచ్చిన ఆయనకు కలెక్టర్ తో పాటు ఇతర అధికారులు పుష్పగుచ్చం ఇచ్చి ఘనంగా స్వాగతం పలికారు.
ఈ కార్యక్రమంలో ఆర్డీవో రాజేశ్వర్, డీఎస్పీ కరుణాకర్, డిఆర్డిఓ అధికారి కృష్ణమూర్తి, అన్ని శాఖల జిల్లా అధికారులు, సంబంధిత అధికారులు తదితరులు పాల్గొన్నారు.
జిల్లా పౌరసంబంధాల అధికారి – కొమురంభీం ఆసిఫాబాద్ చే జారీ చేయనైనది.